Қазақстан Республикасы судьяларының IX съезі: Сот жүйесінің жаңғыруы және реформалар жолы

Қазақстан Республикасы судьяларының IX съезінде Мемлекет басшысы Қасым-Жомарт Тоқаев еліміздің сот жүйесін жаңғыртуға бағытталған маңызды мәселелерді көтерді. Президент сот билігі әрқашан жоғары абыройлы және мінсіз болуы тиіс екенін атап өтті, өйткені әділ сот мемлекеттің негізі болып табылады.

Съезд қатысушылары – судьялар корпусының өкілдері, Парламент депутаттары, мемлекеттік органдар басшылары, заңгерлер, халықаралық ұйымдар мен үкіметтік емес ұйымдардың өкілдері – сот жүйесінің стратегиялық бағыттарын талқылауға және реформалау жолындағы жаңа бастамаларды айқындауға мүмкіндік алды.

Президент өз сөзінде Конституциялық соттың құрылуы, соттардың институционалдық тәуелсіздігін күшейту, кадрлық жүйені жаңарту және сот процесін цифрландыру сияқты маңызды реформаларды атап өтті. Ол 2025 жылдың шілдесінен бастап жұмысын бастайтын кассациялық соттардың құрылуы сот төрелігіне қолжетімділікті арттырып, Жоғарғы Соттың жүктемесін азайтатынын және сот практикасының бірыңғай болуын қамтамасыз ететінін мәлімдеді.

Цифрландыру процесі де маңызды басымдық ретінде көрсетілді. Сот жүйесіне жасанды интеллектіні енгізу, озық технологияларды кеңінен пайдалану арқылы сот істерін жеңілдету, ақпараттық жүйелердің көмегімен ашықтықты қамтамасыз ету реформалардың басты бағыттары ретінде белгіленді.

Судьялар съезі төрт жылда бір рет өткізілетін маңызды алаң ретінде сот жүйесінің стратегиялық міндеттерін айқындап, алдағы реформаларды жүзеге асырудың негізін қалады.

Жалғас Айтжан

ҚР Сот әкімшілігінің Ұлытау облысы бойынша департаментінің басшысы