2025 жыл - Жұмысшы мамандықтары жылы
Қасым-Жомарт Тоқаевтың бастамасымен 2025 жыл Қазақстанда Жұмысшы мамандықтары жылы деп жарияланды. Бұл бастама қоғамда адал еңбек пен азаматтық құндылықтарды дәріптеуге, еңбек адамының мәртебесін арттыруға бағытталған. Мемлекет басшысы кәсіби мамандық иелерінің еңбегін ерекше атап өтіп, олардың қоғамдағы маңыздылығын мойындады.
Ғалымдар, құрылысшылар, кеншілер, геологтер және шаруалар мемлекет тарапынан құрметке ие болып, оларға мемлекеттік наградалар табысталды. Бұған қоса, Қазақстанда тұңғыш рет «Қазақстанның еңбек сіңірген дәрігері» атағы тағайындалды. Бұл бастама елдегі денсаулық сақтау саласындағы мамандардың еңбегін жоғары бағалауға мүмкіндік берді. Сонымен қатар, Еңбек күні бекітіліп, елімізде кәсіби мерекелер қатары толықты.
Таза Қазақстан: Ұлттық экологиялық акция
Президенттің бастамасымен 2025 жылы сәуір айында жалпыұлттық «Таза Қазақстан» экологиялық акциясы бастау алды. Бұл шара елдегі экологиялық жағдайды жақсарту, табиғатты қорғау және халықтың экологиялық мәдениетін арттыру мақсатында ұйымдастырылды.
Жыл бойы жүргізілген акцияға 2,4 миллионға жуық адам қатысты. Елдің түкпір-түкпірінде жүздеген мың аула мен қоғамдық орындар тазартылып, 900 мың тоннадан аса қоқыс шығарылды. Сонымен қатар, табиғаттың көгалдандырылуы басты назарға алынып, шамамен 2,5 миллион көшет отырғызылды. Қоғамдық кеңістіктер мен инфрақұрылымды жақсарту бағытында да үлкен жұмыстар атқарылып, 20 мыңнан аса әлеуметтік нысан, 4,6 мыңнан аса қоғамдық орындар, саябақтар мен шағын бақтар абаттандырылды.
Тарихи және мәдени мұраларды сақтау ісі де назардан тыс қалмады. Акция аясында 5 мыңнан аса тарихи-мәдени нысан мен 758 субұрқақ ретке келтірілді. Бұл жұмыстар еліміздің мәдени мұрасын сақтау және келер ұрпаққа жеткізу мақсатында жүзеге асырылды.
Еңбек адамы – қоғамның негізі
2025 жылдың Жұмысшы мамандықтары жылы болып жариялануы елдегі еңбек адамының мәртебесін көтеруге үлкен ықпал етті. Бұл жыл халықтың өз еңбегін мақтанышпен қабылдауына, жұмысшы мамандықтарының беделін арттыруға, сондай-ақ жас ұрпақты еңбекқорлыққа тәрбиелеуге бағытталды. Мемлекеттің қолдауы мен халықтың белсенділігі арқасында Қазақстанда еңбек адамының қадірі артып, олардың еңбегі лайықты бағалана бастады.
Бұл бастамалар болашақта елдің тұрақты дамуына және қоғамдағы еңбек мәдениетінің жоғарылауына үлкен серпін беретіні сөзсіз.
Гульнур Берикова.