Ұлытау облысында «Таза Қазақстан» акциясы жалғасуда
Ұлытау облысында елді мекендерді абаттандыру, санитарлық тазарту және көгалдандыруға арналған күзгі бірайлық аясында жалпыоблыстық сенбілік өтті.
«Таза Қазақстан» республикалық акциясына өңірден 500-ге жуық ұжым тартылып, барлығы 7 мыңнан астам азамат тазалық жұмыстарына белсене атсалысты.
Іс-шара барысында 70-ке жуық арнайы техника жұмылдырылып, нәтижесінде шамамен 768 тонна қатты тұрмыстық қалдық шығарылды. Сондай-ақ 313 гектар аумақ тұрмыстық қалдықтардан тазартылып, 200-ден астам ағашқа санитарлық қырқу жасалды.
Бұл шара облыстағы елді мекендердің тазалығы мен көркейтілуіне айтарлықтай үлес қосып, тұрғындардың экологиялық мәдениетін арттыруға серпін берді.