Металлургия саласының ардагері Оразалы Мейрамовтың өмірден озуына байланысты қайғылы хабар

Металлургия саласының ардагері Оразалы Мейрамовтың өмірден озуына байланысты қайғылы хабар

Ұлытау облысы үшін орны толмас қаза. Еліміздің металлургия саласының дамуына зор үлес қосқан танымал тұлға, «Құрметті металлург» атағының иегері, қоғам қайраткері Оразалы Мейрамов 89 жасында дүниеден өтті.

Оразалы Мейрамұлы 1935 жылы Өзбекстанның Мырзашөл ауданында дүниеге келген. Еңбек жолын Шыршық қаласындағы «Чирчиксельмаш» зауытында бастаған ол, кейін Қарағанды облысының Қарсақбай мыс қорыту зауыты мен Жезқазған мыс қорыту зауытында ұзақ жылдар бойы абыроймен еңбек етті. Өзінің қажырлы еңбегімен ол металлургия саласының дамуына өлшеусіз үлес қосып, ұрпаққа өнеге бола білді.

Оразалы Мейрамұлы Ленин ордені, «Құрмет белгісі» ордені сияқты жоғары мемлекеттік наградалармен марапатталған. Сонымен бірге ол елімізде металлургия саласындағы еңбекқор династияны қалыптастырған ардақты азамат.

Ұлытау облысының әкімі Д. Рыспеков, Ұлытау облыстық мәслихатының төрағасы Б. Шыңғысов, Ұлытау облысы әкімінің орынбасарлары Ж. Нөпіров, А. Ыдырысов, Ұ. Үсенов, З. Ақылбекова, Жезқазған қаласының әкімі Қ. Шайжанов, Жезқазған қаласы мәслихатының төрағасы Р. Қапарова, «Қазақмыс Корпорациясы» ЖШС басқарма төрағасы Н. Нуриев, «Kazakhmys Smelting» ЖШС бас директоры Ж. Байгабелов, Жезқазған мыс балқыту зауытының директоры С. Атен, «Қазақмыс Корпорациясы» ЖШС жанындағы Ардагерлер кеңесінің төрағасы Т. Бүкіров, Ұлытау облысының Ардагерлер кеңесінің төрағасы С. Қожамсейітов және Жезқазған қаласының Ардагерлер кеңесінің төрағасы М. Қазамбаев марқұмның отбасына, туған-туыстары мен жақындарына қайғырып көңіл айтады.

Оразалы Мейрамұлының жарқын бейнесі мен еселі еңбегі ел есінде мәңгі сақталады.

Марқұмның рухы пейіште шалқысын, артында қалған отбасына сабыр мен күш-қуат тілейміз.