Президенттің жолдауында Қазақстанның әлеуметтік-экономикалық дамуын қамтамасыз етуге бағытталған бірқатар маңызды бастамалар ұсынылды

Президенттің жолдауында Қазақстанның әлеуметтік-экономикалық дамуын қамтамасыз етуге бағытталған бірқатар маңызды бастамалар ұсынылды. Солардың ішінде экономиканы одан әрі монополиясыздандыруға ерекше назар аударылғаны – елдің нарықтық қатынастарды жетілдіру және әділ бәсекелестік орта қалыптастыру жолындағы маңызды міндет екенін көрсетеді.
Экономиканы монополиясыздандыру елдің тұрақты дамуының басты кепілі болып табылады. Монополия нарықтық процестерді тежеп қана қоймай, инновация мен кәсіпкерлікті дамытуға кедергі келтіреді. Сондықтан бұл бағытта нақты институционалдық шешімдер қабылдау қажет. Мұндай шешімдер тек ірі ойыншылардың үстемдігін азайтып қана қоймай, экономиканың түрлі салаларына әділ және тең мүмкіндіктер беруді қамтамасыз етуі тиіс.
Осы тұрғыда «конгломерат» ұғымын заң жүзінде айқындап алу – уақыт талабы. Қазіргі таңда көптеген нарықтық құрылымдар конгломераттық сипатта жұмыс істейді, яғни бірнеше түрлі салада қызмет атқаратын, үлкен экономикалық және саяси ықпалға ие компаниялар жиынтығын құрайды. Егер бұл ұғым заңда нақты анықталмаса, мұндай құрылымдарды реттеу қиынға соғады. Конгломераттардың қызметін айқындау олардың ықпалын тиімді бақылауға, нарықтағы әділетсіз бәсекелестікке тосқауыл қоюға және ашықтықты қамтамасыз етуге мүмкіндік береді.
Сонымен қатар, конгломераттармен байланысты тәуекелдерді басқару үшін олардың құрылымы, қызмет ету шекаралары және заңды жауапкершілігі нақты белгіленуі керек. Бұл экономикадағы әділеттілік принциптерін нығайтып, шағын және орта бизнеске өз әлеуетін дамытуға жол ашады.
Жолдауда айтылған экономиканы монополиясыздандыру және конгломераттарды заң жүзінде реттеу мәселелері Қазақстанның экономикалық саясатының ашықтық пен әділеттілік қағидаттарына негізделгенін көрсетеді. Бұл бастамалар экономиканың тұрақтылығы мен дамуының жаңа кезеңіне жол ашып, азаматтардың әл-ауқатын арттыруға ықпал етеді.
Сауле Рашидова.