Қазіргі жаһандық экономикада елдердің инвестиция үшін бәсекеге түсуі заңды құбылысқа айналды

Қазіргі жаһандық экономикада елдердің инвестиция үшін бәсекеге түсуі заңды құбылысқа айналды. Шетелдік және отандық инвесторларды тарту экономиканың тұрақты дамуының басты шарты болып табылады. Сондықтан инвестициялық ахуалды жақсарту және кәсіпкерлікке қолайлы жағдай жасау – мемлекеттің басым бағыттарының бірі.
Инвестициялық климатты жақсарту үшін ең алдымен тұрақты заңнамалық база қажет. Инвесторлар кез келген мемлекетке қаржы салмас бұрын, сол елдің құқықтық жүйесінің тұрақтылығына назар аударады. Салықтық жеңілдіктер, бюрократиялық кедергілерді азайту, инвесторлардың құқықтарын қорғау – инвестиция тартудың маңызды тетіктері.
Мемлекет тарапынан қабылданып жатқан шаралардың бірі – Инвестициялық штабтың құрылуы. Бұл құрылымға кең ауқымды құзырет берілуі – металлургия, мұнай-газ, химия, туризм, энергетика және машина жасау салаларындағы инвестициялық жобаларды тиімді іске асыруға жол ашады. Бұл өз кезегінде елдің өнеркәсіптік әлеуетін арттырып, жаңа жұмыс орындарын құруға мүмкіндік береді.
Сонымен қатар, инвесторларға тартымды инфрақұрылым мен логистика ұсынылуы қажет. Жолдардың сапасы, электр қуатының қолжетімділігі, интернет инфрақұрылымы және көлік логистикасы – инвестициялық шешім қабылдаудағы маңызды факторлар. Қазақстан өзінің географиялық орналасуын тиімді пайдаланып, шетелдік компанияларға Еуразиялық экономикалық одақ пен Орталық Азия нарығына шығудың алаңы ретінде ұсынылуы тиіс.
Инвестиция тартудың тағы бір маңызды шарты – білімді және білікті жұмыс күші. Инвесторлар кәсіби мамандары бар елдерге басымдық береді. Сондықтан техникалық және кәсіптік білімді дамыту, жоғары білім беру жүйесін жетілдіру – ұзақ мерзімді инвестициялық саясаттың құрамдас бөлігі болуы керек.
Инвестициялық ахуалды жақсарту үшін кешенді шаралар қажет. Құқықтық тұрақтылық, инфрақұрылымды дамыту, тиімді мемлекеттік басқару және жоғары білікті кадрлар даярлау – Қазақстанның инвестициялық тартымдылығын арттырудың негізгі бағыттары. Егер осы салаларда жүйелі жұмыстар жүргізілсе, ел экономикасы қарқынды дамып, Қазақстан ірі инвестициялық орталықтардың біріне айналады.

Сауле Рашидова.