ҚАРАЖАЛ ИНТЕРНЕТ-АЛАЯҚТЫҚТЫҢ АЛДЫН АЛУҒА БАҒЫТТАЛҒАН ФОРУМҒА 400-ДЕН АСТАМ ҚАТЫСУШЫНЫ БІРІКТІРДІ

Қаражал қаласы мен Жәйрем кентінің тұрғындары үшін интернет-алаяқтықтың алдын алу және халықтың цифрлық сауаттылығын арттыруға арналған форум өтті. Іс-шараға 400-ден астам адам — мемлекеттік қызметшілер, студенттер, жоғары сынып оқушылары, педагогтер, мекемелер мен ұйымдардың қызметкерлері, сондай-ақ қала мен кент тұрғындары қатысты.

Іс-шара Ұлытау облысы бойынша экономикалық тергеп-тексеру департаментінің бастамасымен «Ұлытау жастары» қоғамдық бірлестігімен бірлесіп, «Заң мен тәртіп» нарративі аясында ұйымдастырылды. Форумның негізгі мақсаты — азаматтардың интернет-алаяқтықтың заманауи тәсілдері туралы хабардарлығын арттыру және цифрлық ортада қауіпсіз әрекет ету дағдыларын қалыптастыру.

Форум спикерлері қатарында Қазақстан Республикасы Мемлекеттік қызмет істері агенттігінің Ұлытау облысы бойынша департаменті басшылығы, Қазақстан Республикасы Президентінің жанындағы Мемлекеттік басқару академиясының тренері, қоғам белсенділері болды. Спикерлер өз сөздерінде цифрлық кеңістіктегі өзекті қауіптер, алаяқтықтың кең таралған схемалары және жеке әрі қаржылық деректерді қорғау жолдары туралы ақпарат берді.

Форумның практикалық бөлігі қатысушылардың ерекше қызығушылығын тудырды. Олар интерактивті ойындар мен тапсырмаларға белсенді қатысып, күнделікті өмірде кездесуі мүмкін түрлі жағдайларды талдады. Сонымен қатар алаяқтықтың белгілерін ажыратуды, күмәнді қоңырауларды, хабарламалар мен интернет-сілтемелерді анықтауды үйренді.

Практикалық формат қатысушыларға теориялық білім алып қана қоймай, оны нақты тапсырмаларды орындау барысында бекітуге мүмкіндік берді. Олар өздерінің қырағылығын сынап, алаяқтардың кең таралған тәсілдерін талдап, күмәнді жағдайға тап болған кезде қандай әрекет жасау керектігін тәжірибе жүзінде пысықтады.

Бүгінде интернет заманауи адамның күнделікті өмірінің ажырамас бөлігіне айналды. Азаматтар цифрлық сервистер арқылы мемлекеттік қызметтерді алады, онлайн сауда жасайды, банктік операцияларды жүзеге асырады және байланыс орнатады. Сонымен қатар алаяқтар да азаматтарды алдау үшін түрлі психологиялық әдістер мен цифрлық құралдарды қолдана отырып, өз тәсілдерін жетілдіруде.

Осыған байланысты цифрлық сауаттылықты арттыру — профилактикалық жұмыстың маңызды бағыттарының бірі. Келіп түскен ақпаратқа сын көзбен қарау, бөгде адамдарға жеке және банктік деректерді бермеу, растау кодтарын хабарламау, күмәнді сілтемелерге өтпеу және ақпаратты тексеру — алаяқтықтың алдын алуға мүмкіндік беретін қарапайым әрі тиімді шаралар.

Форум әртүрлі жастағы және кәсіби топтардың өкілдерін біріктірген ақпараттық әрі ағартушылық алаңға айналды. Іс-шараның «Заң мен тәртіп» нарративі аясында өткізілуі құқықтық мәдениетті қалыптастыруда және қауіпсіз цифрлық ортаны қамтамасыз етуде мемлекеттік органдардың, қоғамдық ұйымдар мен азаматтардың бірлескен жұмысының маңызын айқындай түсті.

Қатысушылар алған білімдері мен практикалық дағдыларын күнделікті өмірде қолдана отырып, өздерінің цифрлық қауіпсіздік деңгейін арттыра алады және жақындарын ықтимал қауіптерден сақтандыруға үлес қоса алады.

Цифрлық сауаттылық — интернет-алаяқтардан қорғанудың маңызды құралдарының бірі.