Абай болыңыз: ашық терезе — бала өміріне қауіп!

Күз — жайлы кештердің мезгілі. Алайда осы уақытта балалардың қауіпсіздігіне ерекше назар аудару қажет. Жылыту маусымы басталғанда пәтерлердің іші жылып, тұрғындар бөлмені желдету үшін терезелерді жиі ашады. Ал ашық терезе бала өміріне үлкен қауіп төндіруі мүмкін.

Кейде ересектер бөлмені желдету үшін терезені бірнеше минутқа ашып, үй шаруасына немесе телефон қоңырауына алаңдап кетеді. Алайда қайғылы жағдайдың орын алуына бірнеше секундтың өзі жеткілікті. Кішкентай балаларды терезе сыртындағы көрініс, сарғайған жапырақтар, құстар мен көліктер қызықтырады. Ал москит торы жалған қауіпсіздік сезімін тудырады: ол баланың салмағын көтеруге арналмаған және құлаудан қорғай алмайды.

Әсіресе бір жастан бес жасқа дейінгі балаларға ерекше көңіл бөлу керек. Бұл жаста бүлдіршіндер айналасын танып-білуге құмар болады, терезе маңындағы жиһазға өрмелеп, терезе алдына шығып кетуі мүмкін. Олар биіктіктің қаншалықты қауіпті екенін әлі толық түсінбейді.

Қайғылы оқиғаның алдын алу үшін кішкентай баланы терезесі ашық бөлмеде ешқашан қараусыз қалдырмаңыз. Москит торына сенбеңіз. Бала терезе алдына шығып кетпеуі үшін орындық, үстел және басқа да жиһаздарды терезеден алыс қойыңыз. Балаларға ашық терезенің жанында ойнаудың қауіпті екенін түсіндіріңіз.

Терезелерге балалардың өздігінен ашуына жол бермейтін арнайы құлыптар мен бұғаттағыштар орнатыңыз. Бөлмені желдету қажет болса, алдымен баланы басқа қауіпсіз бөлмеге апарыңыз. Желдетіп болған соң терезенің мықтап жабылғанына көз жеткізіңіз.

Балалардың терезеден құлауы ауыр зардаптарға әкелуі мүмкін. Алайда мұндай қайғылы жағдайлардың көбінің алдын алуға болады. Бала қауіпсіздігі ересектердің қырағылығы мен қарапайым сақтық шараларын сақтауынан басталады.

Үйлеріңіз әрдайым жылы әрі қауіпсіз болсын! Есіңізде болсын: қарапайым сақтық шаралары ең қымбат қазына — бала өмірін сақтап қалуы мүмкін. Төтенше жағдай туындаған кезде 112 немесе 101 нөміріне қоңырау шалыңыз.

Жезқазған қаласы ТЖБ-ның аға офицері

подполковник Д. Өскембаев