«Наурыз Тойы — Мереке, Салт-Дәстүрім — Береке»

Елімізде биылғы жылы Наурыз мерекесі 14—23 наурыз аралығында 10 күн бойы атап өтіледі. Әр күннің өзіндік тақырыбы мен мақсаты бар.

17 наурыз — Мәдениет және ұлттық салт дәстүр күніне орай Ұлытау аудандық тарихи-өлкетану музейінің ұйымдастыруымен «Наурыз тойы — мереке, салт-дәстүрім — береке» атты мерекелік іс-шара өтті. Іс-шара Ұлытау аудандық тарихи-өлкетану музейінің көрме залында өтті.
Наурыз мерекесін тек атап өтпей, халқымыздың ұлттық салт-дәстүрлерін жаңғыртып, жастарға үлгі ету мақсатында бүгінгі кеште тұсаукесер, құлақ тесу, және шашбау тағу рәсімдері көрермен назарына ұсынылды.
Келген қонақтарға «Зергерлік әшекейлер» көрмесі таныстырылды.
Алғашқы құттықтау сөзді «AMANAT» партиясы Ұлытау облыстық филиалының атқарушы хатшысы — Мырзабеков Ерлан Батырбекұлы сөйледі. Ұлытау ауданының әкімінің орынбасары — Алмат Қайратұлы және Ұлытау ауданының маслихат хатшысы- Ахат Құрмансейітұлы, Аудандық мәдениет бөлімінің басшысы — Нұрлан Жолаушыұлы кеш қонақтарын Наурыз мерекесімен құттықтап, жылы лебіздерін білдірді.
Ұлытау ауданының өнер мектебінің жетігеншілер ансамбілі «Бүлдірген» әнің нақышына келтіріп орындады.
Тұсаукесер рәсімі
Бала — елдің болашағы. Қазақта «Тұсауы кесілмеген бала сүрінеді» деген сөз бар. Сондықтан баланың болашағы жарқын болсын деп, тұсауын кеседі. Бүгінгі мерекелік шарада Әмір Нұржанұлының тұсауын «AMANAT» партиясы Ұлытау облыстық филиалының атқарушы хатшысы Мырзабеков Ерлан Батырбекұлы кішкентай батырға тілеген айтып, ала жіпті аяғына байлап, баланың тұсауын кесті.
Құлақ тесу
Дана халқымыз қыз — болашақтың анасы деп санап, негізсіз ешнарсе жасамаған. Балауса қыздың тірбиесіне аса мән беріп, жан дүниесі мен тән дүниесінің сұлулығына біртұтас қараған.
7—8 жасқа толғанда тұлымшағы желбіреген қызымыз балалықты артқа тастап, бой түзеп құлағын теседі.
Қыз балаға құлақ тесу міндетті саналып, мәні жағынан сүндеттеумен теңестірілген.
Ұлытау ауданының аналар кеңесінің төрайымы — Жанар Ысқаққызы «Құлақ тесу» ғұрпын жүргізді. Ортаға әжелеріміз, құлағы тесілетін бүлдіршін қыздарымыз аналарымен қоса шықты. Жезқазған қаласынан келген медициналық технологиялармен құлақ тесетін маман — Айгерім Мақсатайқызы қыздардың құлағын тесіп, қыздарға өзінің әзірлеген сыйлығын табыс етті. Ұйымдастырушылар атынан қыздарға қазақша күміс сырғалар табысталды. 4 бүлдіршін қыздардың аналары «Орамал тон болмайды, жол болады» — деп құлақ тесуші Айгерім ханымға жаулығын жауып, қамзол кигізеді.
Әжелеріміз тілегін айтып, артын әнмен жалғастырды.
Шашбау тағу рәсімі
Қазақ халқы қыз баланы ерекше ардақтаған. Қыздың көркі — ұзын бұрым, ал сол бұрымның сәні — шашбау. 13 жасқа толған бойжеткенге шашбау тағу дәстүрін жасайтын болған. Бұл — қыздың есейіп, бойжеткендікке аяқ басқанын білдіретін салт.
Бүгін Зере Қанатқызына анасы Кәмшат — «бұл шашбау — саған арнаған ана жүрегінің аманаты. Ол сенің шашыңды әдемі етіп қана қоймай, жамандықтан қорғайды. Оның сыңғыры жүрген сайын естіледі, сондықтан қатты жүгірме, оқыс қозғалма, шашбауың қатты сыңғырласа сені әдепсіз қыз дейді» — деп шашын өріп, шашбау тақты.
Шашбау таққан Зере қызымызға әжесі батасын берді. Ұйымдастырушылар атынан қызымызға күміс шашбау табысталды. Анасының иығына орамал жабылды. Шашу шашылды.
Ұлытау ауданының өнер мектебінің «Шаттақ» би тобы қазақ биі «Құрбылар» биін биледі.
Іс-шараны Ұлытау аудандық тарихи-өлкетану музейінің басшысы Шымбергенов Рахат Тақанұлы және «Аманат» партиясы Ұлытау аудандық филиалының атқарушы хатшысы Жұманов Думан Айтбекұлы қорытындылап сөз сөйледі.
Кеш қонақтары жайылған Дастарханнан мерекеге арнайы әзірленген наурыз көжеден, ұлттық дәмнен дәм татты.
Бүгінгі той — салт-дәстүріміздің, ұлттық құндылықтарымыздың жаңғыруының айғағы.
Наурыз — тек мереке ғана емес, ұрпақтар сабақтастығының көрінісі. Бүгінгі жас ұрпақ осы дәстүрлерді жалғастырып, қазақтың асыл мұрасын сақтай берсін!
Бүгінгі мерекелік шараға атсалысқан «Аманат» партиясының Ұлытау аудандық филиалына, Ұлытау ауданының аналар комитетіне, Ұлытау ауданының Мәдениет үйіне, Әжелер ансамбіліне, Ұлытау ауданының өнер мектебі және № 1 Тірек мектебінің оқушылары мен ұстаздарына, «Өркен» балабақшасына алғыс білдіреміз!