Мемлекет өзінің соттық-құқықтық жүйесі арқылы қоғамда әділдік пен заңдылықтың сақталуын қамтамасыз етеді

Мемлекет өзінің соттық-құқықтық жүйесі арқылы қоғамда әділдік пен заңдылықтың сақталуын қамтамасыз етеді. Бұл жүйе биліктің үш тармағының өзара іс-қимылын және тепе-теңдігін талап етеді. Соттық-құқықтық жүйеде полиция, прокуратура, соттар және Конституциялық сот өзара бір-бірінің функцияларын толықтырып, әділ шешімдер қабылдауға ықпал етеді.
Полицияның рөлі – құқық бұзушылықтарды анықтап, күдіктілерді іздестіру және жинақталған дәлелдер арқылы тергеу жұмыстарын жүргізу. Бұл құқықтық процестің алғашқы маңызды кезеңі болып табылады, себебі дәлелдердің жеткіліктілігі мен дұрыстығы тергеу нәтижесіне әсер етеді.
Прокуратура – заңдылықтың сақталуын қадағалайтын негізгі орган. Ол азаматтардың құқықтарын қорғау және қоғамдық тәртіпті сақтау мақсатында құқық қорғау органдарының әрекеттерін бағалап, олардың заң шеңберінде жұмыс істеуін қамтамасыз етеді. Сотта прокуратура айыптаушы ретінде әрекет етіп, қылмыстық істің объективті қаралуына ықпал етеді.
Соттар – құқықтық жүйенің негізгі тірегі. Олар тараптардың (қорғау және айыптау) ұсынған дәлелдерін тең дәрежеде қарастырып, әділ шешім шығарады. Сот шешімі заңға негізделіп, құқық бұзушының жазасы немесе ақталуы туралы нақты қорытынды береді. Бұл процесс соттың тәуелсіздігін және бейтараптығын талап етеді.
Егер қандай да бір қайшылықтар туындаса немесе азаматтардың құқықтары бұзылды деп танылса, Конституциялық сот ең жоғарғы орган ретінде мәселені шешеді. Конституциялық сот азаматтардың Конституцияда бекітілген құқықтары мен бостандықтарын қорғау мақсатында жұмыс істейді.
Бұл жүйе мемлекет пен қоғам арасында сенім орнатып, заң үстемдігін қамтамасыз етеді. Әр органның өз қызметін адал орындауы ғана соттық-құқықтық жүйеде үйлесімділікті сақтауға мүмкіндік береді.

Асель Абдырайымова.